KMP: Land Use Conversion, hinungdan sa pagbaha sa Davao, Repormang Agraryo Dapat Ipatuman

Jan. 22, 2013

Sulat Pamahayag
22 Enero 2013

Hagbay ra nagpasidaan ang Kilusang Magbubukid sa Pilipinas (KMP) sa kadaut ug kaalaut gumikan sa kaylap nga land-use conversion ug deforestation nga maoy nag-unang hinungdan sa grabeng pagbaha nga naka-apekto sa 15 ka mga barangay sa dakbayan sa Davao ug sa uban pang lugar sa rehiyon sa Southern Mindanao.

Kini ang giluwat nga pamahayag ni Pedro Arnado, Secretary General sa KMP Southern Mindanao.  Matud pa niya, mukabat sa 17.77% ang pagkunhod sa mga kaumahan sa humay ug mukabat na lang sa 1,300 ektarya ang kalasangan sa Davao kumpara niadtong 1987 nga mukabat pa sa 6,700 ektarya gumikan sa kumbersyon sa gamit sa yuta ngadto sa mga negosyong pabalay, commercial establishments ug plantasyon sa saging ug pinya alang sa eksport.

Magkalambigit ang land use conversion ug deforestation nga ginahimo pud nga pamaagi sa mga agalong yutaan ug gobyerno sa paglikay sa pagpatuman sa repormang agraryo.  Kaylap kini nga panghitabo sa mga lugar sa Marilog, Calinan, Sibulan, Toril, Buhangin, Tigato, Mandug ug Waan nga miresulta sa pagkaguba sa integridad sa nag-unang watershed sa dakbayan, ang Talomo-Lipadas.

“Ug karon ang katawhan ang nag-ilaid sa kalisud gumikan sa grabeng paghaguros sa baha nga sa esensya tubig nga walay kabutngan gumikan sa nanga-upaw na nga kabukiran,” matud pa ni Arnado.

Kahinumdumang kaniadtong Dominggo, January 20, gihapak og dakong pagbaha ang syudad sa Davao ug uban pang sikbit niini nga mga probinsya.  Sa taho sa Provincial Disaster Risk Reduction and Management Council,  1,871,846 ka tawo ang apektado sa 2,077 nga mga barangay gikan sa 181 ka lungsod, 17 ka syudad ug 25  ka probinsya.

Magpabilin ang problema hangtud walay rasyunal nga paggamit sa yuta ug walay tinuod nga repormang agraryo.  Matud pa ni Arnado nga gipasamot lang ang land use conversion ug kawalay yutang matikad ang mga mag-uuma pinaagi sa CARPER (Comprehensive Agrarian Reform Program Extension with Reforms).

Pinaagi niini nalikayan ug malikayan sa mga agalong yutaan ug dagkong negosyante ang pagpatuman sa repormang agraryo nga makita diha sa kaylap nga pagtukod sa negosyong pabalay o establisimyento sama sa Starmall ug Camella Cerritos, nga mga Proyekto sa Crown Communities ni Senador Manny Villar; Twin Palm Subdivision nga iya sa Kisan Lu; Deca Homes sa 8990 Housing Dev’t Corporation; Vista Land Condominium sa Buhangin; Deca homes Esperanza Subdivision; Royal Pines sa Shrine Hills sa mga Consunji; ug Le Jardin sa mga Villa-Abrille.

Gisaysay ni Arnado, “sa climate change nga nasinati karon sa kalibutan, sunod-sunod gayud ang mga dagkong kalamidad nga atong nasinati, sama sa bagyong Pablo nga bag-ohay lang mihapak sa Mindanao.”  Ug angay mag igmat ang katawhan partikular sa mga lugar nga bulnerable sa maong kalamidad.

Dili lang pagbaha ang dakong epekto sa land use conversion, apan ang pagpalayas usab sa mga lumolupyo niini.  Tin-aw ang kasinatian sa mga lumulopyo sa Bariquit compound nga demolisyon ang giatbang kanila.

Nanawagan karon ang KMP sa pagpahunong sa land use conversion ug deforestation ug dapat dus-an na sa paggamhahang Aquino ang pagpasa sa GARB (Genuine Agrarian Reform Bill) aron dunay rasyunal nga paggamit sa mga kayutaan ug tinuod nga pag-apud-apud niini ngadto sa mga kabus nga mag-uuma aron mapalambo usab ang yuta alang sa pagpaneguro sa pagkaon ug reforestation.

Reference:
Pedro Arnado
Secretary General, Kilusang Magbubukid ng Pilipinas
Spokesperson, Anakpawis Partylist Davao City Chapter
0910.226.1000

comments powered by Disqus