Niadtong Abril 27, 2007 sa buntag samtang si PAULINO Dodoy TARAY, sakto ang pangidaron, minyo, usa ka mag-uuma ug lumulupyo sa Purok #4, Mabog, San Roque, Bislig City kuyog sa iyang pamilya nagpahulay sa ilang panimalay kalit nga gilibotan sa mga kasundaluhan sa 36th Infantry Battalion, Philippine Army pinanguluhan ni Lt. De Leon ang ilang balay. Dayon gipangti-onan sila ug pugos nga pagawason si Paulino, kung dili kini mogawas ug mukuyog kanila istrapingon ang ilang panimalay. Dili lalim ang gibati nga kahadlok sa pamilya ni Dodoy Taray ilabina na sa iyang mga gagmay nga anak. Gidala siya sa sentro sa Sitio Mabog ug didto siya gi-imbestigar, tungod sa pag-abot sa igsoon niini nga babaye gibuhian si Dodoy Taray.
Pagka Mayo 4, 2007 sa may alas 5:00 sa hapon illegal nga gi-aresto na usab si PAULINO Dodoy TARAY ug si TOTO POSTRERO nga usa ka sibilyan ug lumulupyo sa maong lugar, sa mga kasundaluhan sa 36th IBPA pinangunahan ni Lt. De Leon. Matud sa pamilya ni Dodoy, gipriso si Dodoy ug si Toto sulod sa CVO nga opisina, wala gipagawas ug gipasagdan ra.
Pagka buntag Mayo 5, 2007 gidala si Dodoy Taray didto sa batalyon sa Scaling sa detachment sa 36th IBPA ug didto gi-imbestigar, kay matud sa mga sundalo usa ka supporter si Dodoy Taray sa New Peoples Army (NPA). Dako ang kabalaka ug kahadlok sa pamilya karon.
Kini usa ka insidente sa pagpanglapas sa tawhanong katungod, kung tinuod nga sad-an si PAULINO dodoy TARAY ug si TOTO POSTRERO, nganong dili man nila formal nga pasakahan og sumbong? Nganong basta na man lang kuhaon sa tagbalay ug idetine nga walay igong rason? Ingon ani na ba ang sistema sa atong balaod karon? Aha naman ang batakang katungod sa katawhan? Unsa na may pulos sa atong korte ug kapulisan?
Klaro ug tataw nga usa ka illegal arrest ug illegal detention ang gihimo sa mga kasundaluhan sa 36th IBPA pinangunahan ni Lt. De Leon. Gihagit namo ang panggamhanan dinhi sa Bislig City ug sa ubang ahensya nga molihok alang sa pagprotektar sa katungod sa usa ka sibilyan. Gihagit usab namo ang kasundaluhan sa 36th IBPA kung tinuod man nga sad-an si PAULINO TARAY o bisan si kinsa nga sibilyan nganong dili man nila pasakahan og sumbong sa korte? Ug dapat dili kini nila idetain sa ilang batalyon kay wala silay jurisdiction nga modetain o mopriso og usa ka tao.
KARAPATAN CARAGA
Alliance for the Advancement of Peoples Rights
4th St. Guingona Subdivision, Brgy. J.P.Rizal, Butuan City
telefax: (085) 3421459; email ad: karapatan_caraga@yahoo.com
reference: Analyn S. Lumawag, Deputy Sec-Gen, karapatan-caraga
contact #: 09187984512
Immediate Press Release
5 May 2007
****** INBOX is an archive of press releases, statements, announcements, letters to the editors, and manifestos sent to Davao Today for publication. Please email your materials to davaotoday@gmail.com. Davao Today reserves the right to edit or refuse material for publication. *****
