Reference: Analyn Lumawag; 09187984512
14 Abril 2007
Press Statement
OPLAN BANTAY LAYA 2: Mas Bangis sa Katawhang Pilipino
Kahinumduman nga gikan sa tuig 2002 hangtud 2006 gipatuman ang usa ka programa sa kontra-insurhensya nga mao ang OPLAN BANTAY LAYA 1. Tumong niini nga sumpoon ang insurhensya sa nasud nga matud sa panggamhanan mao ang gamot hinungdan nga nagpabiling mitiurok ang ekonomiya sa nasud. Apan natapos ang tuig 2006 pakyas kini sa pagsumpo, inay mas migrabe ug nagkalapad ang han-ay sa katawhan nga diskuntento sa pagdumala sa administrasyon ni Gloria Macapagal-Arroyo. Mas misamot ang kagutom ug kalisod sa katawhang Pilipino. Ang pobre misamot kapobre ug ang adunahan misamot ka-adunahan. Sa pagsulod sa tuig 2007 diin mao usab ang panahon sa pagpili og bag-ong mga lideres nga maoy modumala sa atong nasud ug mangulo sa katawhang Pilipino.
Sa tuig 2007 mas gipagrabe ug gipalig-on sa administrasyong Arroyo ang kontra-insurhensya nga programa diin mas bangis ug komprehensibo kini ang OPLAN BANTAY LAYA 2.
Dinhi sa atong rehiyon sa CARAGA ubay-ubay na nga mga kaso sa pagpanglapas sa tawhanong katungod ang nadokumento sa KARAPATAN. Usa na niini ang padayon ang militarisasyon sa kabukiran sa Bislig City, Hinatuan ug Tagbina, Surigao del Sur, ug ang mga munisipyo sa Trento, Bunawan ug Rosario, Agusan del Sur. Nga kining tanan ang nag-unang naapektuhan niini mao ang katawhang mag-uuma nga walay laing tinguha kun dili ang lahimong luwas sa yutang gitikad ug makaangkon sa malinawong pagpuyo. Ang KARAPATAN Caraga nakadokumento og mga kaso sa indescriminate bombing and firng, food blockade, hamletting, illegal arrest, harassment, threat, force fake surrender.
Niadtong Marso 29, 2007 usa ka mag-uuma nga si ALEJANDRO Lando GABICA ang gisaka sa iyang balay sa mga kasundaluhan sa 36th IBPA sa may alas 12:00 sa hatungang gabii. Atubangan sa iyang duha (2) ka anak nga pulos babaye, pugos nga gidala si ALEJANDRO ug gitaptapan ang iyang mata samtang siya gisakay sa military truck ug gi-imbetigar, tapos gipapirma siya sa usa ka papel nga wala siya kasayod kung unsay unod, tungod sa kahadlok nipirma si ALEJANDRO nga maoy nihungdan nga gipangita siya sa mga pulis ug sundalo tungod sa iyang gipapirmahan, nga hangtud karon wala siya kahibalo kun unsa kadto.
Karon lang bag-o, tulo ka mga kaubanan namo sa pagpanalipod sa tawhanong katungod ang gi-ambush didto sa Ilo-ilo, ang usa anaa sa kritikal nga kondisyon samtang ang duha gidagit ug hangtung karon missing. Ang tigpanalipod sa tawhanong katungod usa usab sa mga biktima. Grabe og wala nay kinutoban pa sa pagkapasista ang rehimeng US-Arroyo, mas pa kini mograbe duha ka bulan human sa eleskyon sa pagpatuman sa gi-ingong HUMAN SECURITY ACT OF 2007.
Mas labaw pa nga gipalig-on ni GMA ang maong palisiya pinaagi sa HUMAN SECURITY ACT OF 2007, nga matud pa aron masumpo ang terorismo sa nasud apan sa pagkatinuod ang nag-unang target niini mao ang mga kritiko niini ug tanan nga mokontra ug mosaway sa iyang panggamahan.
Kini pipila lang ka kaso sa pagpanglapas sa tawhanong katungod sa katawhang Pilipino. Sa OPLAN BANTAY LAYA 2 nga programa, wala nay kalainan ang sibilyan sa armado, sa pagtan-aw ug pagtuo sa mga sundalo sa gobyerno nga kung ikaw miyembro sa mga progresibong organisasyon usa na ka NPA. Apan sukwahi kini sa nakabutang sa atong batakang balaod nga nalatid ang batakang katungod sa katawhan.
Hinay-hinay nga giguba sa administrasyon ni Arroyo ang pagkamalinawon ug pagkagawasnon sa usa ka komunidad ngadto sa usa ka hilom tungod sa kahadlok.
****** INBOX is an archive of press releases, statements, announcements, letters to the editors, and manifestos sent to Davao Today for publication. Please email your materials to davaotoday@gmail.com. Davao Today reserves the right to edit or refuse material for publication. *****
