KARAPATAN CARAGA
Alliance for the Advancement of Peoples Rights
4th St. Guingona Subd., Brgy. J.P. Rizal, Butuan City
Telefax: (085) 3421459; email ad: karapatan_caraga@yahoo.com
Reference: Analyn Lumawag; Deputy Sec. Gen.
(0918) 7984512
Press Release
18 April 2007
INAHAN ug ANAK BIKTIMA SA MILITARISASYON
Militarisasyon! Usa na usab ka kaso sa pagpatay. Niadtong Abril 2, 2007, sa may alas 10:00 kapin kun kulang sa kabuntagon, didto sa bukid sa Brgy. Caromata, San Miguel, Surigao del Sur, usa ka gi-alegahang kampo sa mga NPA ang gikatahong gi-raid sa mga kasundaluhan nga sakop sa 58th Infantry Battalion, Philippine Army, mga sakop sa Special Civilian Active Auxilliary (SCAA) ug CAFGU ubos sa 4th Infantry Division. Kalit nga gipabuthan sa mga kasundaluhan ang walo ka mga babaye nga dunay kuyog nga tulo (3) ka bata nga ilang mga anak. Ug diha-diha dayon naigo-patay ang usa ka batang lalaki nga si DANDAN A. QUILLANO, 12 anyos ang pangidaron, lumulupyo sa Sitio Banahaw, Maitum, Tandag, Surigao del Sur. Tungod sa kalisang sa mga biktima nanagan kini aron luwason ang kaugalingon apan nasakpan ang usa ka babaye nga si BETTY A. QUILLANO, 37 anyos ang pangidaron, inahan sa batang lalaki. Gidala kini sa mga sundalo balik sa nahimutangan sa patayng lawas sa iyang anak.
Niadtong Abril 11, 2007, tungod sa kabalaka nga wala na makabalik ang mag-inahan, gisusi sa mga pamilya ang maong lugar ug didto ilang nakita ang patayng lawas sa duha nga pulos mga sunog. Giputol-putol ug nagkabulag-bulag na ang mga parte sa lawas sa batang lalaki ug ang ulo niini nasagol sa ulo sa baboy.
Sumala sa pakisusi sa KARAPATAN-Surigao del Sur gitortyur ang inahan ahya gipatay. Dugang pa, dili kampo sa NPA ang gi-ingong naraid sa mga sundalo, kun dili mga sibilyan nga nagplano nga mag-uma sa maong dapit gamit ang pamaagi nga kaingin system, nga samtang naghulat sila sa ilang mga kaubanan kalit sila nga gipabuthan sa mga militar.
Hangtud karon anaa pa sa maong lugar ang patayng lawas sa mga biktima kay matud sa pamilya baho na kaayo. Sa karon naghangyo og tabang ang pamilya sa biktima tungod kay padayon sila nga gihasi sa mga kasundaluhan kalabot sa insidente.
Ang maong panghitabo timaan lamang kini sa kawalay pagrespeto sa unsa ka bililhon ang kinabuhi sa tawo. NPA man kini o sibilyan nabutang sa atong batakang balaod ang pag-ila sa tawhanong katungod sa usa ka tawo. Ubos sa International Humanitarian Law, nabutang ang usa ka balaod sa giyera, nga aron himoong makitawhanon ang giyera kinahanglan una sa tanan ang pagpanalipod sa kinabuhi sa sibilyan, ang makitawhanon nga pagtratar sa usa ka dinakpan ug sa usa ka armado nga wala nay ikasukol pa. Ang Karapatan-Caraga dugay nang nanawagan sa paghunong sa MILITARISASYON sa kabukiran nga maoy nakapaguba sa kahiusahan, pagkamalinawon ug maayo nga panginabuhian sa usa ka komunidad. Kanunay biktima ang mga mag-uuma nga maoy nagbuhi sa atong nasud ug sa tibuok katawhan. Dili militarisasyon ang sulbad sa krisis o terorismo sa nasud kun dili anaa sa mga nagdumala. Mas pa mosamot ang kahimtang sa tawhanong katungod duha ka bulan human sa eleksyon, tungod sa hingpit nga pagpatuman sa Anti-Terrorism Law ubos sa Human Security Act of 2007. Bisan gani wala pa ang balaod sa ATB migrabe na ang pagpanglapas sa tawhanong katungod.
IHUNONG ANG MILITARISASYON SA KABUKIRAN!
RESPETUHAN ANG TAWHANONG KATUNGOD!
HUSTISYA SA KAMATAYON NI DANDAN UG BETTY QUILLANO!
****** INBOX is an archive of press releases, statements, announcements, letters to the editors, and manifestos sent to Davao Today for publication. Please email your materials to davaotoday@gmail.com. Davao Today reserves the right to edit or refuse material for publication. *****
