Human na ang piniliay sa mga kandidato. Nagsugod na nga giproklamar ang mga nagdaug nga mga lokal nga mga kandidato samtang padayon pa ang canvassing sa national alang sa senador ug Partylist. Taliwala sa kapin gatusa nga nga mga kaso sa pagpatay ug harassment, gipasi-atab sa panggamhanan ni Gloria Macapagal Arroyo, ang COMELEC ug kapulisan nga malinawon ang nahitabong piniliay.
Dinhi sa atong rehiyon, dayag ang vote-buying, pagpanghulga, pagpanghadlok, pagpangilad ug pagpanglimbong bisan mismo sa adlaw sa piniliay ug panahon sa canvassing sa mga balota. Didto sa Bislig City, hapit nasagpa si Rev. Fr. Jerry Sagupayo ni Kapitan Igsoc sa Barangay Labisma, Bislig City, sa dihang gikompronta ni Fr. Sagupayo ug ni Fr. Glen ang kapitan sa gihimo niining pagpamalit og boto. Sa mga kabarangayan sa San Antonio, Borboanan, Mone ug uban pang mga barangay nga layo sa sentro sa Bislig City, bata-batalyon ang naka-deploy nga mga sundalo nga hinungdan sa kahadlok sa mga residente.
Sa Tagbina, Surigao del Sur, atol sa municipal canvassing nasinati sa mga watchers sa mga progresibong partylist nga Bayan Muna, Gabriela, Anakpawis, Kabataan ug Suara ang dili maayo nga pagtratar kanila sa pagreklamo sa mga iregularidad nga nabantayan niini, sama sa dilin pag-ihap sa boto sa Bayan Muna o dili pagtally niini. Nabantayan usab niini ang walay mga pirma sa BEI nga mga election returns ug ang naghinubrang ihap sa mga nakuha nga boto kaysa sa actual nga niboto. Wala usab mogamit og tally board sa municipal canvass sa Tagbina.
Sa Butuan City canvassing, adunay ga nahitabo nga wala magkapareho ang nasulat sa number in words sa number in figures, nabantayan sa mga watchers nga wala ma-entry ang resulta sa usa (1) ka clustered precints nga miresulta sa paggamay sa total votes cast sa ANAKPAWIS, imbes nga mototal og 315 gi-entry lamang ang total og 172 didto sa summary of votes per unit, tungod kay duna kini pito (7) ka unit o canvassing committee. Ang BANAT Party-list imbes nga zero (0) nahimong six (6). Ang BAYAN MUNA imber nga 106 nahimo ang nga 56. Sa Certificate of Canvass (COC). Partikular sa Bayan Muna, 3, 000 ang nakuha nga boto niini apan sa pagtype sa COC nahimo nang 300, ug ang boto nga nakuha sa Bayan Muna didto masulat sa Akbayan party-list. Ang depensa niini sa mga membro sa canvassing committee nga utrohon ra kay nalipatan kini. Apan ang pinaka-grabe diin bag-o lang nabantayan sa grupo ang walay total votes cast sa COC. Duna usab kakulangon sa pagplastar sa mga personnel sa COMELEC sa Butuan City tungod kay ang proseso sa canvassing dapat lain nga table ang canvassing committee ug tabulation group aron hapsay ang dagan sa canvassing. Gani ang mga watchers nalibog kay dunay mga units nga bisan asa gipasa ang sumpay nga pages sa statement of votes sa clustered precints. Ang mga kandidato sa Genuine Opposition sa pagka-Senador biktima sa dagdag-bawas.. Nabantayan usab nga ang boto sa usa ka kandidato pagka Senador ubos sa Team Unity nadugangan og 1,000 nga boto panahon sa pagtabulate.
Sa Nasipit, Agusan del Norte, naa ang pagpabor sa mga BEI sa pipila ka partylist diin ginatally ug giseguro ang boto nga makuha sa ARC ug NELFFI.
Pipila lamang kini nga mga kaso sa pagpanglimbong sa eleksyon. Kani nga mga pamaagi nahitabo taliwala nga dunay mga pollwatchers nga nagbantay, unsa pa kaha kung walay nagbantay?
Tataw nga gigamit sa administrasyon ang lain-laing pamaagi: gipalihok niini ang tanang makinarya aron lang ang mga giila niini nga kontra dili magmalampuson. Mismong mga ahente sa gobyerno sama sa militar ang nangampanya nga dili pabotohan ang mga progresibong partylist ug mga kandidato nga nga progresibo. Nahimong walay pulos ang balaod sa COMELEC nga nagbawal sa pag-apil-apil sa kampanya sa mga government employees, militar ug kapulisan.
Mismong ang mga international observers nakakita sa hiwi nga dagway sa eleksyon sa Pilipians. Apan gibalewala sa Malakanyang ang gipagawas nga report sa international observers, gitubag kini nga, wala kamangka-agan ang maong grupo sa eleksyon sa Pilipinas.
Sa kasamtangan, padayon pa ang ihpanay sa mga boto sa national level, magbantay kita aron mamenos-menosan ang pagpanglimbong.
2007 Elections
