Press Release
12 July 2007
LAING DUHA KA MGA BATAN-ONG LIDER GIDAGIT!
Niadtong Hulyo 5, 2007 sa may alas 11:00 sa buntag kapin kun kulang, samtang nagsakay sa single motor sila DAGAMI Dagami BUTLIG, 24, usa ka staff sa Nagkahiusang Mag-uuma sa Surigao del Norte (NAMASUN) ug NARCISO Poloy ANTIGULAS, 24, usa ka organizer sa Pagkakaisa ng mga Samahan ng Tsuper at Operator Nationwide (PISTON) Surigao, nagbaybay sila sa dalan sa Lower sangay, Barangay Anomar, Surigao City gisundan sila sa duha ka sakyanan nga double cub nga kolor light green ug pick-up nga kolor puti nga adunay plate number nga UTX 436 ug single motor nga dunay dalang radyo, nga matud sa mga nakasaksi, pagkalampas sa tulay sa mga biktima sa maong dapit mga 40 metros ang gilay-on kalit nga gibangga nga gisakyan nila nga single motor ug diha-diha dayon natumba si DAGAMI dagami BUTLIG ug dayon giti-onan kini ug giduslak sa armas, samtang si NARCISO poloy ANTIGULAS nakadagan sa may basakan apan gigukod siya sa mga armadong lalaki dala ang tag-as nga kalibre sa armas nga nigawas gikan sa sakyanan, mga 15 metros ang gilay-on gikan sa kalsada gidakop si NARCISO. Dayon murag baboy nga gisulod ang duha sa sakyanan.
Gireport gilayon sa mga kaubang staff sa duha ang maong panghitabo sa PNP station sa Surigao. Apan subo kaayong palandungon kay hangtud karon walay imbestigasyon nga gihimo sa kapulisan.
Ayha pa ang pagdagit sa duha ka lider. Adunay nahitabong pagdagit sa duha ka trabahante sa TRANSCICLE. Nga matud sa mga biktima, nagsakay sila sa single motor aron mangolekta og bayad, apan kalit lang sila gihunongan sa mga sakyanan nga double cub nga kolor light green ug pick-up nga kolor puti, giti-onan sila, gikulata ug murag baboy nga gilabay sa sulod sa sakyanan. Sa sulod sa sakyanan giti-onan ang duha ka trabahante ug namahayag nga unsaon man mi ninyo sir, wala man mi sala, trabahante man mi , dayon gipangayoan sila og Identification Card, ug pagkakita sa I.D sa duha, ni-istorya dayon ang armadong tawo nga, peste Yawa! Dili man diay ni mao, dayon gilabog sila sa dalan crossing pasulod sa Barangay Anomar. Dali-dali dayon nipasutoy og dagan ang duha ka sakyanan ug usa ka single motor. Dugang asoy sa mga biktima nga nakabonet ug naka-ski mask ang armadong mga tawo.
Usa ka mistaken identity ang nahitabo sa duha, nga nagpamatuod lamang kini nga planado ang gihimo nga pagdagit sa duha ka mga batan-ong lider. Sa hulagway nga gipamahayag sa mga nakasaksi sa insidente, nagtumbok kini nga usa ka ahente sa gobyerno ang responsable.
Hugot nga gikondena sa KARAPATAN-Caraga ang maong panghitabo, balik-balik namong pangutana nga kung dunay sala ang maong mga lider aktibista, nganong dili man kini kasohan ug ipaagi sa hustong proseso? Nganong basta na man lang dagiton? Wala na bay pulos ang tawhanong katungod?
Hangtud karon missing ang duha ka mga lider. Wala pa gani gipatuman ang gi-ingon sa panggamhanan nga HUMAN SECURITY ACT, nahitabo na ang pagpangdagit! unsaon nalang kung ipatuman na!
Uban sa kabanay nila DAGAMI ug POLOY, nanawagan kami sa mga kasundaluhan sa 30th Infantry Batallion, Philippine Army pinanguluhan ni Col. ISIDRO PURISIMA nga ipakita sa publiko ang duha ka lider ug kung tinuod man galing nga wala silay kalabutan, motabang sila sa pagpangita sa duha ka mga lider. Ma-ingon usab kang PNP Chief sa Surigao City nga si Col. DUNGO nga seryosong mohimo og imbestigasyon. Kung tinuod nga sila tigprotektar sa interes ug kaayohan sa katawhan.
IPAKITA SILA DAGAMI UG POLOY!
HUSTISYA ALANG SA MGA BIKTIMA SA ENFORCED DISAPPEARANCE!
IMPORTANT NOTICE: INBOX is an archive of press releases, statements, announcements, letters to the editors, and manifestos sent to Davao Today for publication. Please email your materials to davaotoday @ gmail.com. Davao Today is not responsible for the content of these materials. The opinion expessed in these items does not reflect those of Davao Today and its staff. Please refer to our terms of use/disclaimer.
