KAMATAYON SA LIMA KA CAFGU SA LAWAN-LAWAN, LAS NIEVES, MILITAR ANG RESPONSABLE!
Niadtong Hunyo 26, 2007 sa may alas 12:00 sa hatungang gabi-i kapin kun kulang, nahitabo ang pag-raid sa usa ka detachment sa Lawan-Lawan, Las Nieves, Agusan del Norte. Siyam (9) ka mga CAFGU ug usa ka Detachment Commander nga si 1st Sgt. ROMEO EUPHEMIA, ang nag-duty. Nasakmit ang tanang armas ug napatay si 1st Sgt. Euphemia, samtang ang mga CAFGU gipanggapos sa gituohang mga miyembro sa New Peoples Army (NPA).
Pagka buntag Hulyo 27, 2007 sa may alas 7:00, dunay duha (2) ka MG 520 nga naglupad-lupad ug nagtuyok-tuyok sa komunidad sa Lawan-Lawan. Halos duha (2) ka oras kini nga nagtuyok-tuyok.
Pagka alas 10:00 sa buntag kapin kun kulang sa maong adlawa, mitugpa duol sa detachment ang usa ka helicopter. Ninaug ang napulo (10) ka mga sundalo pinanguluhan ni PFC. ARBY NAPONGAHAN ug PFC. RUFINO IGNACIO ubos sa 23rd IBPA nga naka-uniporme ug armado sa tag-as na kalibre sa armas. Dali-dali nga gipapormasyon ang mga naka on-duty nga mga CAFGU nga sila JOEL BILAYONG, JONI BELAYONG, HUMOK TINABLA, LEGAL MANSINUGDAN ug ALBERT TANYO. Dayon gimandoan nga mokuyog sa ila aron gukdon ang mga NPA nga ni-raid sa detachment. Mireklamo ang ubang CAFGU nga wala pa silay pamahaw ug walay mga armas nga dala. Apan wala sila gipaminaw, nanglakaw sila kuyog sa napulo (10) ka mga sundalo. Dayon niabot si Master Sgt. MATER BAYONA ug gimandoan ang ubang CAFGU nga nabilin nga hiposon ang patayng lawas, aron dalhon sa BANCASI Headquarters ug didto ipadayon nga imbestigasyon sa nahitabo nga raid ug pagkapatay sa detachment commander.
Mga 30 minutos ang milabay, nadungog sa mga kaubanang CAFGU ug mga residente sa maong dapit ang buto-buto nga mikabat sa 5 minutos.
Pagka-hapon mga alas 4:00, nigawas ang balita nga patay na ang lima (5) ka CAFGU nga kuyog sa mga sundalo. Resulta sa panhitabo, namakwit ang 300 ka pamilya sa Lawan-Lawan tungod sa pagpanghadlok sa BULIF (Bungkatol Liberation Front) ug sa mga sundalo sa 30tn IBPA nga patyon nga gitouhang tigsuporta sa NPA.
Dali-dali dayon nipagawas og pamayahag ang kasundaluhan nga dunay engkwentro nga nahitabo tali sa NPA ug kasundaluhan, nga maoy hinungdan sa kamatayon sa lima (5) ka CAFGU. Diin sukwahi kini sa pamahayag sa mga residente, mga pamilya ug mga kaubanang CAFGU sa mga biktima nga walay engkwentro nga nahitabo, tungod kay sa musnod nga mga rason: (1) Ang nabati nga mga buto-buto sa katawhan sa Lawan-Lawan na mikabat lang og 5 ka minuots, walay ilang nabati nga sinukliay sa mga bala. (2) Dunay nakasaksi nga mismong ang mga sundalo ang mi-unay pagpusil sa lima ka CAFGU. (3) Ang lima ka CAFGU nga gikuyog ug gihimong giya sa mga sundalo wala gipadala og armas nga nag-operasyon man kaha? Nganong walay nahitabo sa mga sundalo? Kung mag-operasyon ang mga militar dili lang kini pito o napulo ka mga sundalo.
Uban sa pamilya sa mga biktima, hugot nga gikondena sa KARAPATAN Caraga ang maong insidente. Makita kung unsa ka bangis ang binuhatan sa mga sundalo ilalom sa pagpangulo ni PFC. ARBY NAPONGAHAN. Sa pagpaklaro kung kinsa si PFC. ARBY NAPONGAHAN ug iyang grupo, mao kini ang responsable sa sunod-sunod nga kaso sa pagpanghadlok, pagpanghulga ug pagpamatay sa mga nailang lider mag-uuma sa munisipyo sa San Luis, Agusan del Sur. Mao usab ang esponsable sa nahitabong pagpanglabay og bomba sa nataran ni Brgy. Kapitan MARCELITO PRESCIOSO sa Km. 4, Brgy. Balit, San Luis, Agusan del Sur, niadtong Abril 10, 2007.
Uban sa pamilya sa biktima, nanawagan kami sa Commission on Human Rights nga mohimo og makuting imbestigasyon ug mohatag og hinabang legal ang pamilya sa biktima. Maingon man usab sa Local Government Unit sa Las Nieves, Agusan del Norte ug sa Governors Office nga mohatag og hinabang sa mga pamilya sa biktima ug sa mga residente nga sa kasamtangan namakwit sa Kasiklan, Las Nieves, Agusan del Norte ug nagsinati sa kagutom.
HUSTISYA ALANG SA MGA BIKTIMA!
